帶小孩去旅行執行李CHECKLIST (1-3歲)

帶1-3歲小孩去旅行, 未必比0-1歲BB嘅行李少, 所以小編特別整左個 CHECKLIST係比已經斷奶但又未完全可以跟大人食野嘅小孩各位媽媽參考

1-3歲BB去旅行 ... 開餐!!

去旅行大人都會想食平日喺香港食唔到嘅美食, 但呢D美食又未必啱小朋友食, 例如刺身, 燒物, 麻辣等等... 唔想放棄美食但又唔想難為小朋友, 其實一D都唔難, 小編去旅行都會煮飯比小孩帶出去食, 聽落好似好麻煩, 但其實如果有秘技, 其實都好方便GA~

1. 揀選食物帶去整
小編建議帶D易熟而又唔易壞嘅食物
- 主食: 米 (煲粥用), 通粉, 意粉, 貝殼粉, 螺絲粉
- 肉: 因為易變壞, 小編建議用蛋去代替, 同樣係豐富蛋白質, 但帶蛋去最好用原裝蛋盒, 用毛巾包好個盒先入喼, 以免打爛晒D蛋
- 菜: 避免帶要去皮嘅野去例如薯仔, 紅蘿白, 仲有千祈唔好帶洗左嘅菜去,因為會爛GA,  去到先洗, 或者可以帶粟米去烚比小朋友食

2. 電飯盒
如果屋企有電飯盒, 就一定要帶去, 體積只有一個飯壺咁大, 可以煮食, 好方便
媽媽一朝早起身第一時間將帶去嘅食物全部放晒落去, 按個制先去梳洗叫小朋友起身, 半個鐘左右就煮好, 再放入保溫壺拎出街, 到夜晚都仍然暖暖的...

3. 旅行電熱水煲/旅行電煮食煲
如果冇電飯盒 旅行電熱水煲/旅行電煮食煲隨左煲水烚奶咀, 都可以用來煮野比小朋友食, 小編有以下TIPS比大家, 等大家可以快快手搞掂出門口, 唔好阻左個行程
* 水滾後落晒所有食物落去 
* 等佢滾兩分鐘左右之後就將佢放入比較耐熱嘅保溫壺就可以, 唔洗嘥時間煮到佢林晒, 因為保溫壺會繼續幫你焗熟焗林D食物 (如果白粥無料仲快, 落米滾一分鐘就好放入比較耐熱嘅保溫壺LA,  朝早出發拎出去, 途中唔好開個保溫壺呀, 兩三個鐘後LUNCH就有得食)
*同時間可以用酒店個熱水壺烚蛋, 蛋記得凍水落呀~

有個大TIPS比大家,  旅行電熱水煲會自動感應水滾就關掉, 要煮食物枇佢滾耐D? 只要唔好關蓋,佢就唔會自動關掉, 一直滾GA LA~

4.出街用保溫飯壺
小編用呢款, 官方話可保溫6小時, 其實唔止GA, 佢意思係6小時後溫度先開始慢慢下降, 夠晒拎去旅行用

5. 即食BB餐
如果真係唔想煮, 但又驚去食嘅野唔啱小孩食, 可以去大型超級市場買D即食BB餐同來送飯, 去到餐廳叫個白飯, 就可以撈一包送飯, 好方便

6. 蒸餾水
1-3歲小孩腸胃已經比BB腸胃成熟, 但為免水肚不服, 可以帶兩樽蒸餾水去溝當地嘅水比小朋友飲用

7. 零食
記得帶D上機食呀~

8. 飲水杯/樽

9. 孩子私家膠碗匙羹

***如果未完成戒奶, 就要帶埋下面0-1歲BB行李嘅野LA

10. 奶粉     
出發前計算BB一罐奶粉食幾多日, 計返行程要帶幾多, 寧多莫少啦! 記得出發當日用奶粉格裝好第一日行程嘅奶粉handcarry上機

11. 奶樽
可以買定即棄奶袋放入奶樽, 每餐食完扔得, 唔洗餐餐洗奶樽烚奶樽, 乾手淨腳! 但要睇清楚個奶袋size同你用開個奶樽啱唔啱, 如果唔啱, 就索性買返個奶袋用奶樽, 去旅行冇得烚奶樽用好方便

12. 奶粉格

13.  出街用煲溫壺

1-3歲BB去旅行 ... Zzzzzzz!!

1. 乾淨嘅舊床單     
對於BB黎講, 始終唔肯定酒店床鋪係咪100%乾淨, 最好帶張舊床單去鋪, 用完可以扔唔洗拎返香港

2. BB個私家枕頭同被/睡袋

3. 平日訓覺習慣要嘅果張被/毛巾/公仔  (如有需要)

1-3歲BB去旅行 ... 清潔用品!!

1. BB潤膚露

2. 洗衣液 
可以攞試用裝去用, 如果冇, 就用小樽裝去, 以備不時之需

3. 大毛巾

4. 小毛巾三條

5. 牙刷牙膏

6. 乾同濕紙巾

(如果未戒片)

7. 尿片 

8. 尿疹膏

9. 即棄式換片墊

1-3歲BB去旅行 ... 其他裝備!!

1. 輕便BB車 (如有需要)
航空公司會免費幫你寄BB車而不計算為一件行李, 媽媽可以直接推到閘口, 職員會幫你拎上機

2. BB車雨擋 (如有需要)

3. 衣服鞋襪
小編建議可以帶D剛剛唔啱身或者有少許洗唔甩污積果D, 帶去著完順便可以扔下

4. 雨傘/雨褸

5. 孩子防晒

6.  孩子防蚊用品 

7. 保鮮袋/乾淨嘅膠袋 (以備不時之需)

8. 貼紙簿/填色簿/圖書
帶上機比小孩玩, 打發時候, 有助避免哭鬧

1-3歲BB去旅行 ... 重要物品!!

1. 探熱針

2. 平安藥
去旅行前去見一次醫生, 話佢知BB去旅行.想要D平安藥傍身

3. 退熱貼

4. 暖貼 (如果去凍嘅地方)
如果去嘅地方比較凍, 可以帶暖貼比BB保溫, 但記住要貼第2至第3件衫, 以防過熱, 小編之前會貼幾個喺BB車入面

去旅行做足準備, 會玩得更開心!! 

如果有朋友會帶孩子去旅行, 就快D SHARE呢個CHECKLIST比佢執行李啦!!

帶小孩去旅行執行李CHECKLIST (0-1歲)

帶小孩去旅行, 你預左比一喼行李嘅QUOTA佢, BB 1歲前帶佢去旅行, 要帶齊所有野係非常緊要, 為左方便大家, 小編整左個BB CHECKLIST比各位媽媽參考

0-1歲BB去旅行 ... 開餐!!

1. 奶粉     
出發前計算BB一罐奶粉食幾多日, 計返行程要帶幾多, 寧多莫少啦! 記得出發當日用奶粉格裝好第一日行程嘅奶粉handcarry上機

2. 奶樽
可以買定即棄奶袋放入奶樽, 每餐食完扔得, 唔洗餐餐洗奶樽烚奶樽, 乾手淨腳! 但要睇清楚個奶袋size同你用開個奶樽啱唔啱, 如果唔啱, 就索性買返個奶袋用奶樽, 去旅行冇得烚奶樽用好方便

3. 飲水杯/樽

4. 奶粉格

5. 蒸餾水
BB腸胃比較敏感, 容易水肚不服, 帶足夠嘅水去旅行就完全可以避免呢個擔心, 同奶粉一樣, 出發前兩星期左右計算佢一日要幾多水, 仲要兩星期前開始溝蒸餾水沖奶比BB飲, 到出發前等佢完全適應100%飲用蒸餾水, 咁就萬無一失
雖然水已經佔左半個大喼, 但只係出發有, 返黎D水都飲用晒, 變晒戰利品啦!

6. 獨立包裝即沖米糊 / 即食BABY FOOD視乎個人需要

7. BB果汁

8. BB私家膠碗匙羹

9. 出街用煲溫壺

10. 紗巾

11. 旅行電熱水煲/旅行電煮食煲
可能你會話: 酒店都有啦, 使咩自己帶? 
但係, 你知唔知之前嘅旅客係點用個煲?曾經放過咩落去? 有聽過做DISNEY酒店朋友講, 執房時候發現熱水壺放左喺床邊, 裡面嘅液體係黃色有"壓"味...好得人驚呀!!!!!大人就話可以洗乾淨用, 大菌食細菌, BB又點可以呢?
旅行電熱水煲/旅行電煮食煲帶去除左煲水, 仲可以烚下奶樽個咀同安撫奶咀

0-1歲BB去旅行 ... Zzzzzzz!!

1. 乾淨嘅舊床單     
對於BB黎講, 始終唔肯定酒店床鋪係咪100%乾淨, 最好帶張舊床單去鋪, 用完可以扔唔洗拎返香港

2. BB個私家枕頭同被/睡袋

3. 安撫奶咀 (如有需要)

4. 平日訓覺習慣要嘅果張被/毛巾/公仔  (如有需要)

0-1歲BB去旅行 ... 清潔用品!!

1. BB沐浴露, 洗頭水
可以攞試用裝去用, 如果冇, 就用小樽裝去

2. BB潤膚露

3. 洗衣液 
可以攞試用裝去用, 如果冇, 就用小樽裝去, 用黎洗紗巾

4. 大小毛巾各一

5. 牙刷牙膏

6. 尿片

7. 乾同濕紙巾

8. 尿疹膏

9. 即棄式換片墊

0-1歲BB去旅行 ... 其他裝備!!

1. 輕便BB車
航空公司會免費幫你寄BB車而不計算為一件行李, 媽媽可以直接推到閘口, 職員會幫你拎上機

2. BB車雨擋

3. 咩帶

4. 衣服鞋襪
小編建議可以帶D剛剛唔啱身或者有少許洗唔甩污積果D, 帶去著完順便可以扔下

5. 雨傘/雨褸

6. BB平日最愛嘅小玩具

7. BB防晒

8. BB防蚊用品 

9. 保鮮袋/乾淨嘅膠袋 (以備不時之需)

0-1歲BB去旅行 ... 重要物品!!

1. 探熱針

2. 平安藥
去旅行前去見一次醫生, 話佢知BB去旅行.想要D平安藥傍身

3. 退熱貼

4. 暖貼 (如果去凍嘅地方)
如果去嘅地方比較凍, 可以帶暖貼比BB保溫, 但記住要貼第2至第3件衫, 以防過熱, 小編之前會貼幾個喺BB車入面

去旅行做足準備, 會玩得更開心!! 

如果有朋友會帶BB去旅行, 就快D SHARE呢個CHECKLIST比佢執行李啦!!

大阪SHOPPING攻略 (電器篇)

日本電器出名新奇高科技, 既安全又品質好, 所有最新型號香港可能幾個月甚至一年後先有, 所以去日本點可以唔去買電子產品同電器呀~

大阪邊度有電器賣?

1. 日本橋電電城
位於日本橋嘅電電城係大阪最著名買電器電玩嘅地方, 成條街都賣大大小小不同類型嘅家電同電子產品, 絕對係電器嘅集中地, 價錢未必係最平,但勝在夠多夠齊, 一定搵到你想要嘅野! 另外, 喺電電地入面有一幢專賣電玩同動漫產品嘅地方, 日本人叫佢做小秋葉原, 動漫電玩迷值得一去!

2. 心齋橋 BIC CAMERA
另外一個著名買電器嘅地方, 就係位於最方便嘅心齋橋近難波車站, 叫BIC CAMERA嘅商場, 有各式各樣家電, 電子產品, 攝影器材, 玩具, 家庭用品, 藥房...一家大細去所有人都一定有啱睇啱買嘅野, 有一樣野要留意, 當你比錢果陣可以問下收銀員用咩方法付款有折, 因為有時會做銀聯咭付款有95折嘅優惠, 喺呢度買野仲可以即時做退稅, 好方便

3. 心齋橋驚安の殿堂 (以前叫激安の殿堂)
驚安の殿堂有一層係賣電器, 只要你有耐性喺堆積如山嘅貨品裡面尋寶, 包你有收獲, 呢度亦可以即時做退稅, 試過喺激安の殿堂買空氣清新機, 同牌子喺香港賣嘅最新型號都比日本舊兩代, 喺日本買果部比香港賣緊嘅多左加濕美肌功能, 但日本減緊價嘅價錢只係香港嘅5分之1, 無錯, 係5分之1...抵到爛!! 

日本電器推介

第一位, 當然係喺日本最暢銷, 亦係最受遊客歡迎嘅...電飯煲!! 日本人對於佢地嘅主食係非常有研究, 以前成日覺得喺日本食到嘅飯特別香甜, 而且軟硬適中, 以為係因為自己係日本迷, 真係日本咩都香D, 原來事實係日本人嘅飯煲,係內有乾坤嘅. 基本上所有MADE IN JAPAN嘅新型號飯煲都可以做到香港賣緊過萬蚊果個飯煲嘅功能, 而且價錢絕對比香港平, 最誇張嘅可以比香港平一半, 因為日本製嘅飯煲視採用納米技術, 受熱均勻, 智能自動控制煮飯嘅時間為最基本嘅功能, 所以日本飯煲可以稱霸全世界絕對係有原因

第二位係媽媽們嘅恩物...美容機/導入導出器!! 日本係美容王國, 日本女仔對美容非常一絲不苟, 家用美容機/導入導出器每個女仔都一定有, 所以喺日本有好多唔同種類唔同牌子嘅家用美容機/導入導出器, 而且比香港更新更平, 做左媽媽之後都無時間出去做FACIAL, 所以呢D美容機絕對係小編嘅恩物, 每次做完之後, 清潔,收緊,收毛孔, 保濕嘅效果都明顯睇到, 好多香港人去買嘅HITACHI其實唔係日本最受歡迎嘅, 有個日本牌子叫YA-MAN, 喺日本連續幾年都係最暢銷美容儀第一位, 值得推介!!



第三位我想推介嘅係空氣清新機!! 小編屋企有兩個嚴重鼻敏感人仕, 自從喺日本買左個空氣清新機返黎之後, 我終於有覺好訓啦~ 對於我呢個冇鼻敏感嘅人黎講, 完全感受唔到空氣清新機嘅威力, 但鼻敏感嘅人有左部機之後, 神奇嘅事終於發生啦, 三十年每晚個鼻都塞晒咁訓, 一夜之間冇左...原來空氣清新機係有效嘅! 喺日本買原因好簡單, 又平又新款, 連埋運費都只係香港五分之一價錢, 我果部比香港最新嘅仲要新同多功能, 香港賣緊OVER $5000, 我喺日本買都只係13,000 YEN (即係港幣$845), 身邊有敏感症嘅人一定要去買!!

好想買, 但電器大件又怕難拎返黎, 點算?

喺日本其實有好多郵局, 比香港多好多, 你可以問下酒店附近邊度有郵局,或者酒店有冇代寄, 我每次都係去心齋橋果間郵局寄, 記住, 電器呢D大件但又唔急嘅寄最平嘅船已經可以, 郵局職員會同你講一個月先到, 但每次我都係8-10日就已經收到, 所以唔好嘥錢, 揀最平果隻都好快到, 比個REFERENCE大家, 我上次寄成大部空氣清新機 15KG左右, 運費只係$200, 勝在唔洗自己拎去搭飛機, 直接送到去屋企

小TIPS

日本電器同香港電壓唔同, 要去深水埗配個百幾蚊嘅變壓器, 計埋運費同買變壓器, 都仲平香港一大截~

如果有朋友想去日本買電器但又唔知喺邊度買, 買咩, 點運返黎, 就記得SHARE比佢睇下LA!

日本京阪神 - 親子遊玩 (去奈良安全地餵鹿)

奈良公園係一個可以令香港人放慢腳步, 好好享受大自然嘅地方, 當中最吸引遊人嘅一定係隨處可見嘅奈良鹿, 去奈良睇鹿對於香港人亦係一個好好嘅親子活動, 因為香港唔會見到鹿, 更加無機會咁近距離去接觸佢地, 去親親大自然...

奈良公園嘅鹿係野生嘅, 佢地可以隨意走來走去, 但奈良嘅鹿外表係溫柔善良嘅小鹿斑比, 佢地嘅另一面其實好似馬騮山嘅馬騮一樣會搶遊人嘅食物, 所以帶小朋友去奈良安全地睇鹿要注意以下幾點,

1. 出奈良車站前, 最好收起所有食物, 下面就係小鹿斑比搶我掛喺BB車上麵包嘅証據...

2. 如果小朋友比較細, 要推BB車嘅話, 睇鹿時間曼好先抱起BB, 因為正如狗一樣, 動物天性係欺負體型比較小嘅動物

3. 由於鹿嘅體型比較大, 唔建議比小朋友餵鹿, 甚至揸住餵鹿食嘅鹿仙貝都唔好, 經驗話我知, 帶小朋友去睇鹿係好開心, 因為香港冇, 但餵鹿絕對係唔享受, 謹記鹿係會因為你手上嘅仙貝而衝埋黎咬你同撞你, 如果真係好想餵, 建議由大人餵, 小朋友睇下好啦~

4. 奈良鹿只會因為食物而變得粗暴, 如果發現有鹿用兇惡眼光走埋黎, 只要雙手揮一揮示意你手上並沒有食物,佢地就會即刻變返溫柔嘅小鹿斑比任你影相

帶孩子BBQ注意事項

開始踏入秋冬, 最適合一家大細去郊遊, 只要準備充足, 就可以安全而又開心同小朋友去BBQ

1. 做好防蚊措施, 蚊貼蚊機唔少得
2. 做好防晒, 出門前先幫小朋友搽一次防晒, 到達後再搽多一次
3. 帶備乾糧同水, 因為小朋友唔適合食太多BBQ食物, 最好帶定D麵包比小朋友食
4. 帶備清潔用品如濕紙巾, 毛巾
5. 幫小朋友帶1-2套替換衣物
6. 少量消毒用品以防小朋友玩嘅時候會弄傷

其實, 選擇地點都好重要, 傳統BBQ場地由於只集中BBQ, 全是火爐, 帶小朋友去都比較危險, 依家有好多俱樂部或農莊都有BBQ, 呢類BBQ場地適合親子郊遊, 大人可以BBQ,BBQ地方仲有蓋TIM, 小朋友又可以有大草地跑跑跳跳, 有田地比遊人摘蔬果, 可以餵白兔, 有小型車比小朋友玩, 以下幾個有BBQ嘅場地設備充足, 好適合一家大細去玩

錦田鄉村俱樂部

錦上路環保農莊

Hello Kitty 有機薈低碳農莊